2022 წლის 29-30 სექტემბერს საქართველოს კარიტასის პარტნიორთა შეხვედრა გაიმართა.
ღონისძიებაში მონაწილეობა მიიღეს საქართველოს კარიტასის სხვადასხვა პროგრამების წარმომადგენლებმა, პარტნიორებმა, სახელმწიფო სტრუქტურის წარმომადგენლებმა და მოწვეულმა სტუმრებმა.
შეხვედრაზე საქართველოს კარიტასის ჯანმრთელობის დაცვის პროგრამის მენეჯერმა, გაიოზ ყუბანეიშვილმა პრეზენტაცია ჩაატარა და ისაუბრა ქვეყანაში მიმდინარე მდგომარეობასა და აღნიშნული პროგრამის სამომავლო სტრატეგიულ გეგმებზე.
ასევე, სიტყვით გამოვიდა საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს წარმომადგენელი სოფო ბარბაქაძე, რომელმაც განიხილა საქართველოში ჯანდაცვის პროგრამების მუშაობა და მათი როლი.
პროგრამის სტრატეგიული განვითარების განხილვის ბოლოს, სიტყვა გადაეცა ჯანდაცვის პროგრამის ერთ-ერთი პროექტის, შინმოვლის ბენეფიციარის ოჯახის წევრს, თამუნა გიორგაძეს, რომელმაც აუდიტორიას საქართველოს კარიტასთან თანამშრომლობის საკუთარი გამოცდილების შესახებ უამბო.
ჯანმრთელობის დაცვის პროგრამის მხრიდან, ღონისძიებაზე მოწვეული სტუმრები იყვნენ თბილისის მუნიციპალიტეტის სხვადასხვა რაიონების გამგეობათა სოციალური მომსახურების განყოფილების ხელმძღვანელები.
საქართველოს კარიტასის პარტნიორთა შეხვედრა ორი დღის განმავლობაში მიმდინარეობდა და წარმოდგენილი იყო როგორც ჯანმრთელობის დაცვის, ისე, სოციალური დაცვის, მიგრაცია და განვითარების, ბავშვებისა და ახალგაზრდობის დაცვისა და განვითარების, განათლების გაძლიერებისა და თემებისა და ცალკეულ ინდივიდთა განვითარების პროგრამები.